"Ақтөбе" Рахаевтың рахатын көре ме?

Мысалы, күнделікті ақпараттарды оқып отырсақ, «Ақтөбе» командасы жаңа маусымға қатты дайындалып жатқанға ұқсайды. Өткен жылы біршама қаржыны үнемдеп, тіпті қаржы жымқырғандарды темір торға тоғытты. Енді бұл команда Бердібек Сапарбаевтың нұсқауымен қайта күшеюі мүмкін. Арзан, әрі сапалы легионерлер келіп жатқан секілді. Көбінесе бразилиялықтар. Кезінде донецкінің «Шахтер» командасы да осы бағытта дамыған болатын. Құрамында екі украин, қалғанының барлығы бразилиялық болған кездер кездесті. Ол кезде бұл ұжым Чемпиондар Лигасының іріктеуінде өнер көрсетіп жүрді. Кейіннен сол жұмыстар нәтиже беріп, легионерлер жарқырап шығып, УЕФА Кубогында жеңіске жетті. Бұл командада ойнаған бразилиялықтар қазір әлемдік деңгейдегі топ клубтарда доп теуіп жүр. Виллиан, Матузалем, Тайсон, Эдуардо да Силва, Фернандиньо, Дуглас Коста, Алекс Тейшейра секілді футболшылар жарқ етіп көрінді.

Әрине, «Шахтер» сол кезде бірден осындай мықты бразилиялықтарды ала салған жоқ. Бастапқыда орташа деңгейлілер келді. Кейіннен барып, болашағынан зор үміт күттіретін таланттар ағылды. «Ақтөбенің» де бағыты солай кеткен секілді. Жуниньо, Жуниор, Кассиано, Мамуте, Торрес секілді Латын Америкасынан келген аяқдопшылар әзірге біз үшін жұмбақ. Алайда, олардың ойнаған клубтарынан-ақ деңгейі төмен футболшылар емес екендігін аңғаруға болады. Біреуі «Гремиода» дүркіресе, біреуі Мессилермен қатар жүрген. Одан бөлек «Ақтөбенің» қазақстандық футболшылар арасында жасаған сұрыптауы да төмен емес. «Таразға» керек болмаған Бауыржан Байтана осы маусымда толық ашылады. Себебі, жарты жыл үлкен футболсыз қалған тараздың таланты өзін көрсететін кезге келді. Ақыл тоқтатты, ойын тамашалады, сырт көзбен сынап қарады, енді нағыз ашылатын тұсы. Былайша айтқанда жасыл алаңдағы ресми ойынға қатысқысы келіп, бір иығын жұлып тұрған футболшы. Тартысты футболға аш отыр десек, артық емес.

Байтанадан бөлек тараздың легионынан тағы бір ойыншы бар. Қапталдағы қорғанысты күшейте алатын Берік Айтбаев бар. Ол кезінде Красножанның көзіне түсіп, ұлттық құрамаға алынды. «Таразға» қатысы бар тағы бір шабуылшы алынды. Өткен маусымды сонда өткізген Игорь Зенькович жарақатынан айықса, гол соғудың хас шебері. «Ақтөбенің» өткен жылғы құрамында тамаша тер төккен Никита Бочаров өзге командаға ауысатыны қиын болды. Әйтпесе, ақ-қызылдарға нағыз керек-ақ ойыншы еді. Жергілікті жанкүйерлердің сүйікті ойыншысына айналып үлгерген-тін.   

Сонымен қатар, ақтөбелік команда жоғарыда аталған ойыншылардан бөлек бірнеше жаңа футболшылармен толықты. Атап өтетін болсақ, олар - Рахымжан Розыбакиев, Дамир Даутов, Андрей Сидельников, Антон Шурыгин, Рафкат Аслан, Ардақ Сәулет, Папа Гуйе, Александр Воловик. 

Өткен жылы команда алғашқы алтылыққа енген еді. Биыл сөзсіз Мақсат Тюмалиев басқаратын команда одан төмен мақсат қоймасы белгілі. Команда бапкер Рахаевтың рахатын көре ме, жоқ әлде екі аптадан кейін отставкаға жібере ме – ол жағын уақыт көрсетер...  

Ермұхамед МӘУЛЕН