Қарсыластар қарымды ма?

«Жальгирис» (Литва)

Литваның бірнеше дүркін чемпионы Чемпиондар лигасында елордалық «Астанаға» қарсылас атанып отыр. Бұл жерде негізі Станимир Стойлов командасына жеребе жолдас болмады деп айтуға да болады. Себебі, «Жальгиристен» де төмен деңгейлі командалар болған. Бірақ, дегенмен де «Астана» биыл негізгі командалар қатарынан жеребеге түсіп, өзінен деңгейі төмен қарсылас алып отыр. Оның барлығы ұжымның өткен жылғы маусымда тамаша өнер көрсеткенінің арқасы.

1947-жылы құрылған Литваның ең атақты командасы өз елінде теңдесіз мықты ұжым. 6 рет чемпионатты, 9 рет кубокты иеленген. Ал, 1987-жылы Кеңес одағының чемпионатының қола жүлдегері атанған. «Жальгиристің» академиясынан Эдгарас Янкаускас, Робертас Пошкус, Дейвидас Шемберас секілді Еуропаға танылған мықты ойыншылар шыққан. Сонымен қатар, 2005-жылы бұл команданы қазақстанға танымал бапкер Саулюс Ширмялис баптаған болатын. Литваның мақтанышына айналған бұл клубтан түлеп ұшқан футболшылар Қазақстан чемпионатында көп өнер көрсетті. Олардың ішінде осы күні де премьер-лигамызда доп теуіп жүрген аяқдопшылар бар. Мысалы қостанайлық «Тобыл» сапында ойнайтын Артурас Жулпа 2013-14-жылғы маусыда дәл осы «Жальгирис» сапында доп тепкен.  

«Жальгирис» еурокубоктық ойындардың топтық кезеңіне шықпаған команда. Өткен жылы чемпиондар лигасында тіпті екінші айналымнан шығып қалған. Швецияның «Мальме» командасына қарсылас атанған литвалықтар қос матчтың қорытындысы бойынша 1:0 есебімен жеңіліп қалды. Сондықтан да, бұл теке тіресте елордалық «Астана» фаворит саналары анық. Тәжірибиелі легионерлері бар Қазақстан чемпионы келесі кезеңге өтуі тиіс деп есептейміз. Жоспар бойынша алғашқы матч Вильньюста 12/13-шілде күндерінің бірінде өтуі тиіс. Ал, жауапты ойын Астанада 19/20-шілде күндеріне жоспарланған.

«Теута» (Албания)

Алматылық «Қайратқа» жеребе жолдас болды дей аламыз. Қарсылас болып Албания супер-лигасында өнер көрсететін «Теута» командасы түсіп отыр. Адриат теңізінің жағасында орналасқан Дуррес қаласының ұжымы Еурокубоктарда аса қатты тәжірибиелі емес. 1920-жылы құрылғанымен, команда басынан талай алма-ғайып заман өткерген. Қаржылық дағдарысты көп кешіріп, тар жол тайғақ кешкен. Тек 1993/94-жылғы маусымда ғана Албания чемпионы атанады. Албания кубогын үш рет қана жеңген. Бледи Шкемби есімді атақты футболшы осы командадан түлеп шыққан. Шкемби осыдан үш жыл бұрын «Скендербеу» сапында қарағандылық «Шахтерге» қарсы ойнаған.

Жерар Гоу мен Андрей Аршавин секілді футболшылары бар алматылық «Қайрат» бұл қарсыласты оңай өтуі тиіс. Алғашқы ойын алдымен Албанияда (30-маусым), сосын қарымта ойын Алматыда (7-шілде) өтеді.

«Чукарички» (Сербия)

Шымкенттік «Ордабасы» қарсылас ретінде өзінің деңгейлес қарсыласын алды. Себебі, сербияның кез-келген командасы еурокубоктық ойындарда жанын салып ойнайды. Таланттар ұстаханасына айналған Сербия әлемге қаншама атақты футболшыны шығарып берді. «Чукарички» де сондай талантты ойыншыларға бай команданың бірі. Команда 1926-жылы құрылған. Белградтың шетінде ағатын Чукарице өзенінің құрметіне аталған бұл клубтың қазіргі атауы «Чукарички Станком». Себебі «Станком» компаниясы бұл команданың басты демеушісі. Стадионы небәрі жеті мың адамды сыйдыратын белградтық команда соңғы екі маусым Еуропа лигасында өнер көрсетіп жүр. Алғашқы айналымды өткеннен кейін команда екі маусымда да жарысты екінші айналымнан аяқтап отырған. Өткен жылы олар Словенияның «Домжале» командасын жеңіп, екінші айналымға жолдама алады. Онда олар Әзірбайжанның «Габала» командасымен кездеседі. Алғашқы ойында 1:0 есебмен жеңіске жеткен сербиялықтар, сырттағы матчта 2:0 есебімен жеңіліп, жарыстан шығып қалады.

Сонымен қатар, атақты «Манчестер Сити» командасының қорғаушысы Александр Коларов дәл осы «Чукарички» командасында ойнап бастаған. Дегенмен де, сербияның бұл командасын «Ордабасы» жеңіп өте алады деп сенеміз. Себебі, алғашқы ойын сыртта өтеді. Ол матч 30-шы маусым күніне жоспарланған. Ал, жауапты матч Шымкентте 7-ші шілде күні болады.

МТК (Венгрия)

Венгрияның МТК командасы ішкі чемпионатта біршама дүрілдеген. Венгрия чемпионатын 23 рет жеңіп, 19 мәрте кубок иегері атанған. Осы күндері Венгрия құрамасының сапында ойнап жүрген біршама футболшы осы МТК футбол клубының академиясынан шыққандар. Олардың ішінде ең танымалы Кристиан Немет. МТК өткен маусымда «Ақтөбе» секілді Еуропа лигасының алғашқы айналымынан өте алмай қалған. Қазақстандық команданың «Нымме Кальюге» жеңілгені сенсация болып бағаланса, МТК-ның жарыстан шығып қалғаны таңқаларлық оқиға болған жоқ. Олар өз алаңында 0:0 тең түскеннен кейін, сырт алаңда «Вайводинаға» 1:3 есебімен жеңілген. Осылайша екінші айналымға сербиялық команда өткен. Биылғы «Ақтөбенің» жағдайын қарасаңыздар венгрияның бұл командасы отандастарымызға дәл деңгейлес болып тұр. Юрий Уткульбаевтың командасы МТК-дан өтсе тіпті тамаша болар еді. Айта кетуіміз керек, «Ақтөбе» алғашқы ойынды 30-шы маусым күні өз алаңында өткізеді. Ал, 7-ші шілдеде олар Венгрия астанасы Будапештте ойнайды.

Ермұхамед МӘУЛЕН