Мықтылар шайқасы. "Қайраттың" қарсыласы кім? 

Мойындау керек, «Қайраттың» бірінші айналымдағы қарсыласы шымкенттік пен ақтөбелік ұжымдардың жолына кесе-көлденең тұрған командаларға қарағанда едәуір осал болды. Оған Алматыдағы ойын толықтай дәлел. Шабуылдағы Гоу бастаған жігіттердің жомарттығы болмағанда, бұрын-соңды Еуропа лигасында тіркелмеген есеп тіркелер ме еді, кім білсін.

«Қайрат» жазғы трансферлік маусым кезіңде жыртығын жамап бақты. Тетрадзе бапкердің басын ауыртқан басты мәселе ол - орталық қорғаныс болатын. Бұл позицияға клуб басшылығы бір футболшыны алды. Ол мансабының басым бөлігін Испанияда өткізген Сесар Арзо. Испанияда футбол әліппесін үйренген ол өте тәжірибиелі футболшы. Одан бөлек команда сапын Стас Покатилов, Гафуржан Сүйімбаев, Бауыржан Тұрысбек, Херсон Асеведо толықтырды. Командадан Лукаш Тесак, Бруно Соарес, Виталий Ли, Сито Риера кетті. 

Еуропа лигасының екінші кезеңінде «Қайратпен» күш сынасатын ұжым - "Маккаби Тель-Авив" болып отыр. Израильдықтар бірінші кезеңде біздің «Қайрат» секілді қарсыласын таптап өтті. Қос ойын қорытындысы бойынша «сарылар» словениялық «Горица» командасының қақпасына жауапсыз төрт гол тоғытты.

«Маккаби Тель-Авив» Израиль футбол тарихындағы ең алғаш құрылған клуб. 1906 жылы негізін қалаған. Израильдың 23 дүркін чемпионы. 22 мәрте ел кубогын де еншілепті. Лақап аты - «сары сойқандар» немесе «сарылар». 1962 жылы ашылған 14 900 жанкүйер сыйатын "Блумфилд" стадионында қарсыластарын қабылдайды.

Еурокубоктардың топтық кезеңдерінде біршама күш сынасқан клуб. Соңғы бес жылдың үшеуінде топтық турнирлерге қатысыпты. Екі мәрте Еуропа Лигасының, бір рет Чемпиондар лигасының топтық сайысында бақ сынаған. Былтыр клубтар арасындағы әлемдегі үздік турнирде «Челси», «Порту» және «Динамо Киев» клубтарымен бір топта ойнап, соңғы орын алып қалғаны бар.

Ең алғаш рет, «Маккаби Тель-Авив» біздің «Астана» секілді бірден Чемпиондар лигасының топтық кезеңінде өнер көрсетіпті. Сонау 2005 жылы «Ювентус», «Бавария», «Аякс» секілді алыптармен арпалысып жүріп, төрт ұпайды қоржынға салған. Осыдан кейін, алты жыл үнсіз болған «Маккаби ТА» 2011/2012 маусымда Еуропа лигасының топтық кезеңінде бақ сынап көрді. Алайда, топтан шыға алмады. Ал, араға бір жыл салып, өткен қателіктен сабақ алған команда Еуропа Лигасының плей-офф кезеңіне жолдама алады. Десек те, 1/16 финалда еурокубоктардың тұрақты қонағы «Базельге» түсіп, Щвейцария елінің өкіліне жол береді. Бірақ, дәл былтыр Чемпиондар лигасының үшінші кезеңінде осы «Базельді» екі ойын қорытындысы бойынша сан соқтырып, есе қайтарған еді.

Израиль чемпионатынан Қазақстан Премьер-лигасындағыдай тек бір команда ғана Чемпиондар лигасына жолдама ала алады. Алдыңғы жылы өз елінде чемпион атанған «Маккаби», өткен маусымда ол атағын қорғай алмады.

Команда сапы өткен маусыммен салыстырғанда көп өзгере қойған жоқ. Алайда, басты сұрмергенін Қытайға жіберді. 36 ойында қарсыластар қақпасын 35 мәрте дәл көздеп, Израиль біріншілігінің рекордын жаңартқан Эран Захавиді «Гуанчжоу Фули» клубына 8 миллион еуроға сатып, олжаға кенелді.

Карьерасының жарқын кезеңін «Ливерпульде» өткізген 36 жасар ардагер футболшы Йосси Бенаюн да осы ұжымның намысын қорғайды. Йосси «Горицаға» қарсы ойында мергендігімен танылды.

Израильдік ұжым биыл танымал болған 3-5-2 жүйесінде ойнайды. Бұл жүйені ара-тұра 3-4-2-1 жүйесіне алмастырып та тұрады. Яғни, ортада үш қорғаушы. Былайша келгенде, қорғаушы саны шабуыл кезіңде үшеу, қорғанар сәтте бесеу. Орталық қорғаушылардың кем дегенде біреуі-шабуылды бастайтын, қарсыластың жартылай қорғаушылары мен қорғаушыларын қапыда қалдыратын пасқа ие болуы тиіс. Екі қапталда жоғары жылдамдыққа ие, әрі физикалық тұрғыдан мықты қос лотериал болуы керек. Ал, қос шабуылшы (немесе бір шабуылшы) үнемі қарсыластың қорғаушыларын өз айып алаңынан асқан тұста-ақ қыспаққа алып отырады.

«Маккабидің» қақпасын 20 жастағы Предраг Райкович қорғайды. Райкович «Астанада» доп тебетін Максимовичпен бірге былтыр жастар арасында әлем чемпионы атанған еді. «Сербияның Касильясы» деген лақап аты бар.

Орталық қорғаныста Омри бен Харуш, Таль Бен-Хаим және Эйтан Тиби деген футболшылар ойнайды. Айта кетерлігі, Эйтанға жетекші чемпионаттардың клубтары көз тігіп отырғаны жасырын емес. Әсіресе, Франция чемпионатында өнер көрсететін «Сент-Этьен», «Лион» секілді командалар өз қатарына қосқысы келеді. Бойының биіктігіне қарамастан Тиби жылдам. Кейде, оң қапталдағы лотериалдың бірімен орын алмасып шабуылға белсенді араласып кетеді.

Қорғаушыларға үнемі көмектесіп отыратын алаңның ортасында ойнайтын команда капитаны - Альберман мен Перец бар. Екі лотариалдың қызметін Носа Иджебор және Босния ұлттық құрамасының футболшысы, былтырғы Бразилияда өткен әлем чемпионатына қатысқан Харис Медунянин атқарады. Иджебордан сақтану керек. «Қара құрлықтың» тумасы әмбебап футболшы. «Горица» қақпасына қос гол соғыпты. Бенаюн мен 24 жастағы Дор Миха шабуылға жақын ойнайды. Негізгі шабуылшы - Орландо Са. Матч барысында шабуылға көмектесетін Бенаюн немесе Миханың біреуін алып, екі шабуылшыға да көшуі мүмкін.

Маккабиді грузиндік маман Шота Арвеладзе баптайды. Нидерланды футболынан тәлім алып, сол елдің бар қыр-сырын бойына сіңірген бапкер. «Аякс», «АЗ Алкмаар» сынды жетекші командалардың намысын қорғаған Шота, кейін "АЗ Алкмаардың" тізгінін ұстаған Рональд Куман, Луи ван Гал, Дик Адвокат секілді аты әлемге әйгілі бапкерлердің көмекшісі қызметін атқарған. Ал, соңғы бес жылда бірнеше түрік командаларын баптапты. «Маккабимен» маусымның 16-сы күні келісім-шартқа отырған.

Іріктеуді алғашқы кезеңнен бастап отырған ең мықты команда осы - «Маккаби Тель-Авив». Бұл тұрғыдан, «Қайраттың» жолы болды деп айта алмаймыз. Израильдік ұжымның мақсаты - кем дегенде топтық кезеңге шығу ғана емес, одан әрі асып, плей-офф кезеңіне жолдама алу. Былтыр Чемпиондар Лигасының топтық кезеңінде ойнаған ұжым, әрине, алдына осындай мақсат қоюға құқылы. Әйтсек те, алматылық ұжымның жігіттеріне былтырғы жинаған тәжірибие серік болады деген үміттеміз.

Фараби ӘБДІХАЛЫҚ