"Ақтөбе" жетістіктері бапкерлердің арқасында ма?

Владимир Муханов

«Ақтөбе» футбол клубында соңғы 10 жылда бес рет бапкер ауысты. Әрине бұл жақсы көрсеткіш емес. 2006 жылы командаға ресейлік маман Владимир Муханов бапкер ретінде келді. 2006-2012 жылдардың аралығында Муханов «Ақтөбені» ел біріншілігінде үш рет қатарынан чемпиондық атаққа жеткізді (2007, 2008, 2009). Қазақстан чемпионатының екі мәрте күміс жүлдегері (2006, 2010) және екі мәрте қола жүлдегері атанып (2011, 2012), «Ақтөбе» футбол клубының тарихындағы әзірге ең нәтижелі бапкер ретінде тарихта қалды. Мухановтың ойындағы басты тактикасы допқа көп иелік ету болатын. Владимир Мухановтың осындай ойын жүйесімен көптеген жүлделер алынды. Ол Самат Смаковты клубтың аңызына айналдырды десек болады. 2012 жылы Муханов клубтан ресми түрде кетті. Сол кезде Самат Смаков та командадан кеткен болатын.

Владимир Никитенко

2013 жылдың басында клубқа жаңа бапкер болып Владимир Никитенко мырза келеді. Ол кезде 53 жасар маман «Ақтөбеге» Қызылордалық «Қайсардан» келді. «Ақтөбеде» бар жоғы бір жарым жыл жұмыс жасады. Ең алғашқы жылы клубты чемпиондық атаққа жеткізді. 2013 жылы чемпиондық атаққа негізінен «Ақтөбе» мен елордалық «Астана» клубы таласты. Барлығы ең соңғы турда анықталатын болды. «Ақтөбе» өз алаңында шымкенттік «Ордабасы» клубын қабылдап, соңғы минуттарда ғана есепті теңестіріп, чемпиондық атаққа жеткен еді. Келесі маусымның ашылуында «Астана-Арена» стадионында дәстүрге айналған Қазақстан Cуперкубогы үшін ойын өтті. Ол ойында ел чемпионы «Ақтөбе», Кубок иегері қарағандылық «Шахтермен» ойнады. «Ақтөбе» «Шахтердан» 1-0 есебімен басым түсіп, Қазақстан футболында суперкубокты үш рет алған алғашқы команда атанды. Никитенконың кезінде команда допқа онша иелік ете қойған жоқ. Басты тактика көбірек қорғанысқа мән беру. Ойын барысында бір гол соғып, қорғаныста ойнау. Қарымта шабуылда қарсыластырын тұсап ұстайтын. Сол кездері «Ақтөбе» жанкүйерлерінің көбі команда ойынына наразы болып, бұрында 3-4 доп айырмасымен жеңетін едік, ал қазір бір доп айырмасымен жеңетін болғанбыз деп сын айта бастаған. Көп ұзамай 2014 жылдың шілде айында команданың сүреңсіз ойынына байланысты Владимир Никитенко жұмысынан босатылды.

Владимир Газзаев

«Ақтөбеге» 2014 жылы шілде айында ТМД-ға танымал бапкер, ЦСКА клубымен УЕФА Кубогын жеңген Валерий Газзаевтың ұлы Владимир Газзаев келді. Бұл бапкер «Ақтөбеде» тура бір жыл жұмыс жасады. Еурокубоктегі сәтсіздіктер үшін клубтан кетті. 2015 жылы Еуропа лигасының алғашқы кезеңінде эстониялық «Нымме-Калью» клубына жол беріп, бүкіл елге масқара болғаны бар. Алайда, сол жылы команда Қазақстан чемпионатында 19 ойын бойы жеңілмей келген. Бірақ, басшылықтын көңілі толмай, 2015 жылдың шілде айында бапкермен келісім-шарт мезгілінен бұрын күшін жойды.

Йоан Андоне

2015 жылдың шілде айында «Ақтөбеге» румын маманы Йоан Андоне маусым соңына дейін командаға бас бапкер ретінде келген. Оған қойылған мақсат - ішкі біріншілікте чемпион атану. Бірақ румын маманы бұл тапсырманы орындай алмады. Чемпионатты үшінші орынмен аяқтап, келесі маусымда Еуропа лигасына қатысу құқығына ие болды. Маусым аяқталған соң клуб қаржылық дағдарысқа ұшырады. Ойыншылардың көбісі трансферге қойылып, команданың бюджеті екі есе қысқарды. 

Юрий Уткульбаев

2015 жылдың желтоқсан айында ресейлік «Рубин» командасының жастар құрамасының бапкері  Юрий Уткульбаев «Ақтөбемен» үш жылдық келісім-шартқа отырды. Ол жастармен көп жұмыс жасаған, танымал бапкер Құрбан Бердыевтің шәкірті. Сонымен қатар, команда сапына клубтың аңыз ойыншысы Самат Смаков қайта келді. «Ақтөбе» футбол клубы биылғы маусымды өте сәтсіз бастады. Команданың алға қойған мақсаты үздік алтылыққа ену. Дмитрий Васильев басқарған, Юрий Уткульбаев баптаған команда Еуропа лигасының бірінші раундында венгриялық «МТК» Будапешт командасына екі ойынның қорытындысы бойынша 3:1 есебімен жол берді. Еурододаға жорығын аяқтаған соң, команда бар күшін чемпионатқа салып, бірінші кезеңге қойған мақсатты орындап, алтылыққа енді. Екінші кезеңде командаға үздік төрттікке кіру мақсаты қойылды. 

Мирас ҚАРТБАЙ